Kalurahan Ngoro'oro

Wewengkon Padhukuhan

Kalurahan Ngoro-oro wonten sangang padhukuhan inggih menika :

1. Padhukuhan Tawang, dipun pandhegani dening Suprihatin,
2. Padhukuhan Sepat, dipun pandhegani dening Rukmini,
3. Padhukuhan Gembyong, dipun pandhegani dening Gimin (seda tanggal 14 April 2020)
4. Padhukuhan Klegung, dipun pandhegani dening Maryoto,
5. Padhukuhan Gunungasem, dipun pandhegani dening Ika Wihayanto,
6. Padhukuhan Salaran, dipun pandhegani dening Endang Wuriyanti,Pd.SD.
7. Padhukuhan Senggotan, dipun pandhegani dening Wiwin Endarwati,
8. Padhukuhan Soka, dipun pandhegani dening Kaswadi,
9. Padhukuhan Jatikuning, dipun pandhegani dening Munawar,

        Panyengkuyungipun para warga tumrap tlatah sakiwa tengen sanget ageng, semanten ugi pranatanipun wewengkon saged ndadosaken tata titi tentrem tumraping para warga.

        Awit saking mekaten kalawau, antawisipun wewengkon kaliyan para warga mboten saged dipun pisahaken, amargi kekalihipun tansah manunggal. Menawi dipun tingali sakeplasan, masarakat Kalurahan Ngoro-oro sampun kaperang dados sangang padhukuhan ingkang satunggal kaliyan satunggalipun mboten sami.

        Ancas pamarentah ngawontenaken padhukuhan-padhukuhan menika mboten kangge mbentenaken satunggaling paguyuban warga kaliyan paguyuban warga sanesipun, ananging ing babagan menika kaajab kanthi wontenipun padhukuhan-padhukuhan kala wau saged ngrancang murih gampil lampahing paprentahan wiwit pusat dumugi ngandhap. Pramila lurah nggadhahi jejibahan paring katrangan saha nuntun para warga tumuju dhateng tekad manunggaling sedya kados sesanti hamemayu hayuning bawana, luhuring budaya santosaning agama, kuncaraning bangsa lan negara. Kanthi mekaten saged langkung terwaca ancasipun, bilih kawontenaning wewengkon lan para warga ing Kalurahan Ngoro-oro namung satunggal, inggih menika lingkungan lan para warga Ngoro-oro.

        Warga Kalurahan Ngoro-oro tansah ngleluri budaya adiluhung tilaranipun para leluhur duk ing nguni, menika minangka ngurmati labuh-labet bekti lan amanah ingkang dados piwucal luhur para sepuh, ing antawisipun ;

• Gotong royong
• Aja dumeh
• Wong Jawa aja ilang jawane
• Narima ing pandum
• Sepi ing pamrih rame ing gawe
• Watak andhap asor.

Foto 5. Cakruk Rt 32 padukuhan Soka

Sumber; Koleksi Endang Wuriyanti (taun 2020)

       Sesambetan antawisipun warga satunggal kaliyan sanesipun tansah lelandhesan raos kurmat-kinurmatan, andhap asor, lung tinulung, gotong royong, asah asih lan asuh. Agama minangka panuntun gesang dados lelandhesan, wewaler, pepadhang, pengayom, panuntun kiblating panembah dhumateng Allah ingkang Maha Kuwaos. Adat budaya ingkang taksih lumampah lan dipun ugemi sedaya warga Kalurahan Ngoro-oro, ing antawisipun :

• Sambatan

Sambatan menika satunggaling adat budaya magepokan kaliyan pedamelan ingkang mbetahaken tenaga kathah. Magersari sakanan-kiring tiyang ingkang gadhah damel nggadhahi ancas caos panyengkuyung wujud tenaga kangge ngrampitaken pedamelan kala wau. Pakaryan ingkang padatan mawi sambatan inggih menika mbangun griya.

• Rewang hajatan utawi  sripah

Saben wonten tiyang kagungan damel hajatan utawi tiyang ingkang nembe nandhang duhkita, mboten  badhe rampung tanpa panyengkuyunganipun sanak sedherek, magersari sakanan-kiring saking wiwitan ngantos pungkasan.

• Gugur gunung utawi gotong-royong

Gugur gunung utawi gotong-royong magepokan kaliyan paguyuban ingkang makarya ing siti pategalan, olah tetanen, umumipun dipun tindakaken para ibu-ibu. Pakaryan gugur gunung utawi royongan dipun ayahi kanthi gentosan.

Sedaya pakaryan ing nginggil dipun lampahaken kanthi becik tanpa pamrih mboten ngantu-antu prabeya menapa dene opah. Sedaya adat budaya kala wau taksih lumampah ing kalurahan menika ingkang dereng mesti dipun panggihaken ing wewengkon sanesipun.  Para warga ngrumaosi bilih raos kekadangan menika mboten badhe saged dipun lintu ngangge arta menapadene prabeya ingkang ageng, wontenipun namung raos lung-tinulung  kaliyan tangga tepalih, magersari. 

Foto 6. Satunggaling gerakan resik-resik margi ing padukuhan Soka

Sumber; Koleksi Bp Kaswadi (taun 2020