Kalurahan Ngoro'oro

Kalurahan Ngoro-oro inggih menika satunggaling kalurahan ingkang mlebet wewengkon Kapanewon Patuk Kabupaten Gunungkidul ingkang dumunung ing iring lor tlatah Gunungkidul arupi redi, sawah lan siti pategalan.

Tapel wates Kalurahan Ngoro-oro inggih menika :

• Sisih Ler tapel wates bumi kaliyan Srimartani, Piyungan, Bantul lan Gayam Harjo, Prambanan,
• Sisih Wetan tapel wates bumi kaliyan Kalurahan Nglanggeran lan Kalurahan Terbah.
• Sisih Kidul tapel wates bumi kaliyan Kalurahan Nglanggeran lan Kalurahan Salam
• Sisih Kilen tapel wates bumi kaliyan Kalurahan Patuk

Wiyaring tlatah Kalurahan Ngoro-oro wonten 753.7909 Ha. Tebih caketing papan paprentahan Kalurahan Ngoro-oro dumugi Kantor Kapanewon Patuk 5 Km, Kantor Kabupaten 27 Km saha Kantor Pemerintah D.I.Yogyakarta 37 Km. Kalurahan Ngoro-oro mujudaken satunggaling tlatah ingkang anggadhahi tata paprentahan ingkang sah kaliyan sampun dipun akeni dening Pamarentah Pusat. Kalurahan mujudaken paprentahan ingkang anggadhahi :

1. Kukuban kalurahan kanthi tapel wates ingkang gumathok.
2. Wonten warga ingkang mapan wonten tlatah utawi kukupan Kalurahan Ngoro-oro ingkang mujudaken satunggaling pakempalan
3. Anggadhahi tatacara utawi adat tumrap gesang sesrawungan antawisipun warga ing wewengkon wau ingkang mujudaken satunggaling pranatan.
4. Sampun jumbuh kaliyan paugeran nagari lan dados peranganing pandom ingkang mboten saged kapisahaken.

        Jumbuh kaliyan paugeran nagari, paprentahan kalurahan utawi kalurahan nglampahi pranatan pusat saha daerah. Ingkang mekaten sesambetan kaliyan lembaga ingkang ngesuhi kalurahan ugi kawastanan miturut pranatan ingkang wonten.

        Kawontenan pasiten ing Kalurahan Ngoro-oro mujudaken pareden, tegalan saha wewengkon sawah . Wonten siti tegalan, pekawisan, pereng-pereng redi, siti kraton utawi Sultan Ground (SG) lan sanes-sanesipun. Ing papan ingkang miring kathah sela-sela ingkang saged dipun ginakaken kangge mawarni-warni kabetahanipun tiyang kathah. Saperangan iring ler wonten papan wisata arupi grojogan ingkang kawentar katelah Wisata Jurug Gedhe. Jurug Gedhe kalebet salah satunggaling wisata ingkang mapan ing padukuhan Gembyong.

Kejawi kadadosan saking pareden, pategalan, ugi nggadhahi  sumber toya ingkang saged migunani tumrap panggesanganipun warga, antawisipun :

• Sumber Kali Mejing
• Sumber Kali Jurug
• Sumber Belik Sendhang
• Sumber Belik Bendho
• Sumber Belik Nduren
• Sumber Sumur Bor
• Panguwaosaning pasiten ing Kalurahan Ngoro-oro saged kaperang, ing antawisipun :
  1. Siti ingkang dipun kuwaosi dening pamarentah kalurahan inggih menika siti kas kalurahan, lungguh pamong, lan siti pengarem-arem.
  2. Siti ingkang dipun dadosaken hak milik pribadi utawi siti pakulen turun temurun.
  3. Siti kagungan Dalem Kraton Ngayogjakarta Hadiningrat Sultan Grond (SG).